ROXAS CITY -Makunsidera nga case closed na ang kaso sang pulis nga tumandok sang probinsiya sang Capiz nga nasapwan nga wala na sang kabuhi sa barracks sang 1st Negros Occidental Police Mobile Force (NOCPFMC) sa syudad sang Escalante sang damlag lang.
Suno kay Col. Romeo Baleros, Provincial Director sang Negros Occidental Police Provincial Office, nga ila na ginakabig nga sarado na ang kaso bangud natul-id na sa imbestigasyon nga accidental firing ang ginkabangdan sang kamatayon ni Patrolman Richard Villasis sang Barangay Jaena Norte, Jamindan, Capiz.
Na-establisar sa resulta sang imbestigasyon sang kapulisan sa Negros Occidental, SOCO kag sa ginpatigayon nga paraffin test nga accidental firing ang natabo sa diin posible nagalimpyo sang iya service firearm ang biktima kag wala nakahibalo nga may yara pa sang bala sa cylinder sang armas.
Gindepensahan man sini ang nauna nga ginpaguwa nga pahayag ni Police Lt. Col. Necarato Sabando Jr., OIC chief of police sang Escalante City Police Station nga nagguwa sa ila inisyal nga imbestigasyon nga nagpanginmatay si Patrolman Villasis bangud sa depresyon.
Suno kay Baleros nga inisyal pa lamang yadto nga imbestigasyon bangud wala sang upod sadto nga tion ang biktima kag nasapwan na lamang duha ka oras makaligad ang insedente.
Gindula man ang isyu nga nagsuicide si Villasis suno kay Baleros, bangud nagaproseso pa ang biktima sang iya nga promosyon, kag indi ini senyales nga depress ang biktima.
Ginkumpirma man sang opisyal nga may upod ang biktima sa ila detachment nga nakabati sang lupok sang pusil, sa diin sa pagtsekyar sa palibot, wala ini sang may nakita.
Natigayon lamang makita ang duguon nga lawas ni Villasis sang nagpadulong sa iya barracks ang kaupod para maghulam sang helmet.
Samtang suno sa opisyal nga nabaton kag nagapati na ang pamilya ni Patrolman Villasis nga accidental firing ang gintunaan sang iya kamatayon, sa diin nahibaluan man sang utod sang biktima nga isa ka policewoman kag yara sa investigation section ang ginpatigayon nga imbestigasyon agud matul-id ang ginkabangdan sang kamatayon sang biktima.
