Nagpagwa sang mandu ang Office of the Ombudsman nga suspendihon si Acting Senate Sergeant-at-Arms Mao Ranada Aplasca pinaagi sa preventive suspension.
Sa idalum sang nasambit nga mandu, si Aplasca ang suspendido nga wala sang sweldo sa sulod sang anum (6) ka bulan, ukon tubtub sa pagtapos sang administrative hearing angot sa iya kaso.
Suno sa Ombudsman, kinahanglanon ini nga tikang bangud ang padayon nga pagpungko ni Aplasca sa iya posisyon mahimo makaapekto sa integridad sang imbestigasyon, may kaangtanan sa mga hitabo sa Senate building sang Mayo 13, 2026.
Katuyuan sang preventive suspension amo ang pagpabilin nga safe ang mga dokumento kag ebidensya nga yara sa iya kustodiya, kag malikawan ang anuman nga posible nga impluwensya sa kaso.
Kadungan sini, ang Ombudsman nagpaguwa man sang Subpoena Duces Tecum para sa CCTV footage gikan sa 2nd floor kag basement parking sang Senado.
Padayon pa ang imbestigasyon agud mahibaluan ang bug-os nga detalye sang insidente kag kon may salabton si Aplasca.
