Gin-anunsyo sang negosyante nga si Anthony Pangilinan, amay sang aktor nga si Donny Pangilinan ang desisyon sang ila pamilya nga maghatag sang discount sa diesel sa ila gasolinahan agud mabuligan ang mga motorista sa pag-atubang sa nagasaka nga presyo sang mga produktong petrolyo bangud sa nagalala nga tensyon sa Middle East.
Sa social media post, ginpahayag ni Anthony nga ila na-assess ang epekto sang pagtaas sang presyo sang gasolina, indi lang sa ila negosyo kundi mangin sa ila komunidad.
Suno sa iya, ang iya bata nga si Donny nga kaupod man sa amo nga negosyo ang nagduso sang P3 nga discount sa kada litro sa regular nga presyo sang diesel sa ila station sa South Forbes, Cavite.
Apisar nga gin-ako nga indi ini paborable kun kita ukon “numero” ang pagahambalan, nagpangibabaw ang ila handum nga buligan ang mga motorista kag mga konsumidor nga nagahimakas na bangud sa serye sang pagtaas sang presyo sang langis.
Nagpasalig ang pamilya Pangilinan nga ipabilin ang manubo ang presyo sang diesel tubtob masarangan sang ila operasyon.
Gindayaw naman sang mga netizens ang anunsyo nga ginhimo sang mag-amay.
Matandaan nga sang Lunes, gin-anunsyo sang Department of Energy (DOE) nga mahimo maglab-ot sa P114 kada litro ang presyo sang diesel subong nga semana, apisar nga nagkasugot ang mga kumpaniya sang langis nga buhinan ang pagtaas sang presyo sa pila ka adlaw.
