Gindepensahan sang aktres-beauty queen nga si Alma Concepcion ang aktor-politiko nga si Arjo Atayde, nga gin-akusahan sang mga kontraktor nga sanday Sarah kag Curlee Discaya nga isa sa mga opisyal nga ginaalegar nakabaton sang “kickback” gikan sa ila kumpaniya may kaangtanan sa maanomaliya flood control projects.
Sa iya Facebook post, ginpakigbahin ni Alma ang mga litrato halin sang tuig 2021 kun sa diin kaupod niya si Sylvia Sanchez, ang iloy ni Arjo, kag iban pa nga mga abyan sa ila beachfront property kag yate.
Suno kay Alma, ang mga propedad sang pamilya Atayde ang natukod kag naangkon antes pa man nagsulod sa pulitika si Arjo.
Bangud sa mga alegasyon, liwat nga nagtuhaw ang daan nga interview sang iloy ni Arjo sa diin ginpakita sini ang ila beachfront property nga gingamit sang mga netizens bilang pamatuod sang maluho nga pangabuhi sang pamilya sa tunga sang isyu sang korapsyon. Una na nga ginpanginwala ni Arjo nga nagabaton ini sang kickback halin sa pondo sang government projects kag nagpasalig naman ang iya tiayon nga si Maine Mendoza nga magapasaka sila sang kaso batuk sa mag-asawa nga Discaya.
Samtang, liwat naman nga nagtuhaw ang videos kag pictures ni Arjo kaupod ang anay district engineer sang Bulacan nga si Henry Alcantara sa hampang sang Philippine Basketball Association.
Apang ang duha ang indi man magtupaday sa pulungkuan bangud ginapatung-an si Arjo sang mga aktor nga sanday Daniel Padilla kag Zanjoe Marudo.
Sa pihak sini, madamo sa gihapon sang mga netizens ang indi magpati nga indi kilalahay ang duha.
