Gin-athag sang aktres nga si Bella Padilla nga indi pareho ang iya pagpati kag panindugan sa pulitika sa iya tiyo nga si Sen. Robin Padilla.
Suno kay Bella, bisan magkadugo ang mga ini, wala ini nagakahulugan nga pareho ang ila pagpati sa pulitika.
Ginpakigbahin man sang aktres nga madugay na sila nga wala nagakit-anay sang iya tiyo.
Suno sa iya, bag-o lang sila nagkit-anay sa tion sang call time para sa proyekto nga “Blood vs Duty,” kag antes sini, tatlo ka tuig na ang nagligad halin sang ila katapusan nga pagkit-anay.
Pahayag pa niya wala man niya gin-impluwensyahan ukon ginduso ang pagkuha kay Robin sa primetime action-drama nga “Blood vs Duty.”
Ini nga klaripikasyon ang natabo sa tunga sang mga kritisismo sa pagkuha kay Robin sa amo nga show apisar sang mga political tensions nga nagakatabo subong sa Senado.
Matandaan nga subong nga semana pila ka beses nga nangin kontroberyal si Robin bangud sa iya pagpasingit kay Sen. Kiko Pangilinan; panindugan sa impeachment proceedings batok kay Vice President Sara Duterte; kag ang ginaalegar pagbulig kay Bato dela Rosa agud nga makapalagyo sa Senado.
