Emosyonal nga ginpakigbahin sang aktres nga si Kaye Abad nga madinalag-on niya nga nalampuwasan ang iya pagpakigbato sa sakit nga Breast Cancer matapos ang halos isa ka tuig nga pagbulong.
Sa iya birthday vlog nga ginpaguwa, gin-share ni Kaye nga una niya nga natukiban ang iya kondisyon matapos naka-eksperyensya siya sang grabe nga sakit sa tiyan kag nagpa-check-up.
Suno sa aktres, una nga natukiban sang mga doktor nga may yara ini sang gallstones antes ginpanugyanan nga magpaidalum sa mammogram kon sa diin nakita ang apat ka sentimetro nga malignant tumor sa iya dughan.
Kaupod sang iya bana nga si Paul Jake Castillo, nagpabulong si Kaye sa Singapore samtang temporaryo nila nga gintugyan sa mga himata ang ila duha ka kabataan.
Apisar sang iya naagyan nga kabudlay, ginpahayag ni Kaye nga ang iya pagtuo sa Dios kag ang suporta sang iya pamilya ang nangin kabakod niya kag malipayon man niya nga gin-anunsyo nga siya ang cancer-free na.
