Pagahiwaton sa Roxas City sa Oktubre 23 tubtob 24 ang ADHD Society of the Philippines Regional Conference 2026 agud mapalapad ang kaalam kag paghangop sang publiko parte sa Attention-Deficit/Hyperactivity Disorder ukon ADHD, lakip ang nagakaigo nga suporta para sa mga indibidwal nga may sini nga kondisyon.
Sa interview sang Bombo Radyo kay Jojo Villareal sang ADHD Society of the Philippines, iya ginopahayag nga ang ini nga aktibidad ang mangin oportunidad agud mapalapad ang paghangop sang publiko sa mga kabudlayan nga ginaatubang sang mga may ADHD kag sang ila mga pamilya.
Paagi sa amo nga aktibidad, ginatinguhaan nga mapabakod ang awareness parte sa ADHD kag mapromote ang mas inklusibo nga palibot para sa mga indibidwal nga may sini nga kondisyon, ilabi na sa ila mga kinahanglanon sa edukasyon, trabaho kag adlaw-adlaw nga kabuhi.
Nagapanawagan man ang natungdan, nga mangin bukas ang publiko sa pagtuon parte sa ADHD agud malikawan ang stigma kag diskriminasyon, kag masiguro nga ang mga indibidwal nga may sini nga kondisyon makabaton sang paghangop, pagrespeto kag oportunidad nga kinahanglan nila.
