ROXAS CITY – May ginpahamtang nga tawo sa Roxas City Integrated Transport Terminal nga mahimo pamangkutan sang mga pasahero sang insakto nga pletehay sa syudad sang Roxas.
Ini ang ginpahayag ni Mr. Victor Arcenas, administrador sang RCITT, sang mainterview sang Bombo Radyo.
Suno kay Arcenas, ini nga initiyatibo ang ginpatuman agud malikawan na ang kaangay nga hitabo sang tricycle driver nga ginmultahan sang Traffic Management Unit (TMU) sang ‘overcharging’ matapos nga ginpahayag nagsukot ini sang P200 sa pasahero nga pangayaw, halin sa terminal padulong sa Gerry Roxas Foundation sa Brgy. Dayao.
Dugang pa sang administrador, makahuluya ini nga buluhaton sang pila ka mga tricycle drivers, kag maapektuhan diri ang pangalan sang terminal kag sang syudad, ilabi na nga nagahilapit ang Capiztahan kag ginalauman nga may mga pangayaw nga magapadulong sa Roxas City.
Bangud sini, ginsuspinde ang amu nga driver nga makapila sa terminal sa sulod sang 15 diyas, apang ginklaro ni Arcenas nga makabiyahe ini sa bug-os nga syudad.
Nahibaluan nga ang trabaho sang ginpahamtang nga tawo amu ang pagkuha sang city number sang nagapila nga tricycle, pagpamangkot sa pasahero kun pila ang sukot sa iya sang driver kag pagpahibalo sa pasahero sang insakto nga balayran.
Wala man nagatugda ang tagdumalahan sang terminal kun kabubut-on sang pasahero nga pasobrahan ang ila plete.
Kun si Arcenas ang pamangkuton, luyag sini nga pataasan ang penalidad sa ‘overcharging’ sa P1,000 agud mamadla ang mga tricycle drivers nga nagapamentaha.
