ROXAS CITY – Wala sang kamatuoran ang mga nagalapta nga alegasyon batuk sa Administrative Officer sang Capiz Rehabilitation Center (CRC) nga ginpabusong sini ang asawa sang isa ka inmate.
Ini ang ginpahayag ni Administrative Office Andreow Llaver sa ekslusibo nga interview sang Bombo Radyo Roxas.
Suno kay Llaver nga indi sini mahimo ang mga alegasyon batuk sa iya bangud tigulang na ini kag may kaugalingon naman nga pamilya.
Magluwas diri, may yara man ini sang balatian kapareho na lamang sang highblood, diabetes kag Rheumatoid Arthritis gani wala sa iya pinsar nga magpangbabaye.
Hugot man sini nga ginpanginwala ang alegasyon nga ginpabusong niya ang asawa sang isa ka inmate kag pagkuha sang mga cellphone number sa mga asawa sini.
Dugang pa sini nga malapit lamang ang ila balay sa nasambit nga pasilidad gani imposible ini nga matabo.
Ginpahayag sini nga nakibot na lamang ini sa nagalapta nga isyu sa sulod sang pasilidad kun sa diin ginapahayag nga halos tanan nga mga asawa sang mga inmates ang ginadiskarteha sini.
Samtang, nag-aapelar naman si Llaver nga mauntat na ang mga alegasyon bangud apektado naman ini kag ang iya pamilya.
