ROXAS CITY – ‘Adopt a family this Christmas’.
Ini ang pagpanghangkat ni Office of the Civil Defense Region 6 Director Jose Roberto Nuñez sa publiko para sa mga stranded nga pasahero sa mga pantalan sa Region 6 bangud sa bagyo nga Ursula.
Sa interview sang Bombo Radyo kay Nuñez, ginhangkat sini ang publiko nga magbisita sa pinakamalapit nga pantalan sa ila nga lugar kun sa diin may stranded nga pasahero kag maghatag sang bulig pinaagi sa paghatag sang pagkaon kag iban pa.
Isa man ini ka pamaagi suno kay Nuñez agud mapakita ang matuod-tuod nga kahulugan sang Paskwa kag pagbuligay sang mga Filipino sa oras sang kalamidad.
Samtang, ginpasiguro ni Nuñez nga nakaalerto 24/7 ang ila nga hanay bangud sa nasambit nga bagyo.
Naghatag naman ini sang mandu sa Disaster Risk Reduction and Management Offices (DRRMO) sa bilog nga rehiyon para sa ila tagsa ka mga emergency response plan.
Mahibaluan nga nagapabilin sa blue alert status ang talatapan bangud sa nasambit nga bagyo.
