Adviser sang criminology student nga naaksidente-patay sa motorsiklo bangud sa , nagpaathag nga wala na sang inug-comply sa iya subjects ang biktima

ROXAS CITY -Gin-athag sang adviser sang 2nd year college criminology student nga wala na ini sang inug-comply nga mga requirements sa Capiz State University – Dumarao Campus kabaliskaran sa mga nagalagaw nga mga alegasyon nga ginabasol ang unibersidad angut sa kamatayon sang biktima.
Ini ang ginpanindugan ni April Joy Abelito, Program Chair sang Criminology Department sa nasambit nga buluthuan.
Ginpahayag ni Abelito nga wala na sang may inug-comply pa nga requirements ang napatay nga si Krestilyn Villance bangud lunsay natapos na sini sumiter ang iya mga requirements sa duha ka mga subjects sang tinalikdan nga Abril 27, 2020.
Ginpanindugan man ni Abelito nga wala na ini naga-require sa mga estudyante sang online submission sa mga reports humalin sang Abril 29,2020.
Apang ginkakibot sini sang naaksidente kag napatay si Villance kadungan sang pagbasol sa unibersidad angut sa kamatayon sang biktima.
Samtang ginakasubo naman sang pamumunuan sang amo nga buluthuan ang natabo kay Villance apang ginpanindugan sini nga wala sila sang kontrol sa paglakat ni Villance agud magpangita sang signal sang internet
Mahibaluan nga nagaguwa sa imbestigasyon sang Dumarao Municipal Police Station nga nagpadulong si Villance kag amay sini sa Astorga, Dumarao agud magpangita sang signal sang internet bangud may inug-sumiter nga report ang biktima apang sa pagpauli sang mag-amay, nadulaan sang kontrol sa manubela ang amay ni Villance kag dalayon nga natumba sa dalan ang motorsiklo.