ROXAS CITY – Gintawag ni Roxas City Councilor Albert Gregory Potato nga ‘invalid’ ang advisory sang Office of the Presidential Assistant nga curfew para sa mga senior citizens kag mga estudyante bangud sa coronavirus disease (COVID-19) pandemic.
Sa interview sang Bombo Radyo, ginpahayag ni Potato nga wala sang gahom ang Presidential Assistant nga mag-isyu sang anuman nga order nga ipatuman sang local government unit (LGU).
Wala man ini sang poder suno sa iya agud tugdaan ang Sanggunian sa pag-legislate.
Aminado naman ang konsehal nga nakita sini ang maayo nga katuyuan sang Presidential Assistant apang suno sa iya, ‘vague’ ang nasambit nga advisory bangud dapat nga may yara ini sang parameters kag exemptions.
Dapat man suno diri nga mapapasar anay sang ordinansa ang Sanggunian ukon sang Executive Order ang isa ka local chief executive antes ini ipatuman.
Bangud sa ‘confusion, gilayon man suno diri nagpaguwa sang pagpaathag ang Office of the Presidential Assistant nga wala nila ginamanduan ang LGU sa baylo ginaganyat lamang ini nga magpatuman sang nasambit nga curfew.
Bangud diri, ginpahayag ni Potato nga bukas ang Roxas City council agud hinalaan ang nasambit nga advisory apang temporaryo anay sila nagpapasar sang resolusyon nga ginapangabay ang mga senior citizens kag estudyante nga magtenir sa ila balay kadungan sang ginapangatubang nga krisis sang pungsod bangud sa COVID-19 pandemic.
