Gin-abi-abi sang Armed Forces of the Philippines ang bag-o nga liderato sang Joint U.S. Military Assistance Group (JUSMAG) Philippines sa ila introductory call kay General Romeo S. Brawner Jr.
Personal nga nakigkita si Gen. Brawner Jr kag incoming Chief sang JUSMAG Philippines nga si Colonel Daniel Oh. Sa tion sang paghinun-anon, ang duha ka kampo nagpamatuod sang ila suporta sa isa kag isa.
Liwat man nga ginpalig-on sang duha ka mga lideres ang ila pangako sa pagpabaskog sang alyansa sa tunga sang US kag Pilipinas agud mapabaskog kag maamligan ang kalinong kag seguridad sa bug-os nga Asia-Pacific Region.
Si General Brawner nagpabutyag man sang pagpasalamat sa padayon nga bulig nga ginahatag sang JUSMAG sa nagkalain-lain nga kapasidad, halin sa capacity-building, kag paghanas, tubtob sa paghatag sang logistic assistance.
Si Colonel Oh ang magabulos sa outgoing chief Colonel Edward R. Evans nga naghimo man sang exit call gikan sa AFP sang Mayo 9.
Ang Joint US Military Assistance Group to the Republic of the Philippines nagaserbe bilang U.S. Security Assistance Organization (SAO) sa Pilipinas.
Ang lider sini amo ang responsable sa pagpanguna sa mga misyon sang pagbulig sa seguridad kag indi seguridad sang US sa Pilipinas. Lakip diri ang Joint Combined Bilateral Exercise Program kag iban pa nga mga programa militar, base sa gindeterminar sang Mutual Defense Board.
