Gin-activate na man sang Armed Forces of the Philippines ang ila disaster response units kag ginpahulag ang mga tinawo kag assets agud magresponde sa nahalitan sang bagyong Enteng.
Kaangut sini, nakahigh-alert kag handa nga ideploy ang sa 11 Search, rescue kag Retrieval teams. Ginakabuuan ang mga grupo nga ini sang 6 nga opisyal kag 98 ka enlisted personnel nga equip sang 19 nga land assets kag 7 sea assets para maghatag sang bulig sa mga ginbaha nga lugar kag maghiwat sang rescue operations.
Sa isa ka statement, ginpahayag ni AFP Chief of Staff General Romeo Brawner Jr. nga fully committed ang Hukbong Sandatahan ng Pilipinas sa pag-alalay sa disaster response efforts kag pagsiguro sa seguridad sang mga Pilipino sa tion sang kalamidad.
Sa karon, nagabulig ang AFP units sa mga lokal nga gobyerno kag iban pa nga mga ahensiya sang gobyerno agud masiguro ang madasig kag nagakaigo nga pagresponde.
Nagahiwat man sang briefings kag mustering exercises ang nasambit nga mga team agud mapaghandaan ang deployment kag estratihiko nga nakaposisyon ang mga assets para maabot ang mga critical area.
