ROXAS CITY – Agaway sa duta kag daan nga hiligut-anon ang posible rason sa pagpatay sa biktima nga si Michael Albay alyas “Itoy”, 56-anyos sang suspek nga mismo gumangkon sini nga si Silvestre “Panoy” Albay sa Sitio Lagasa, Barangay Ambilay, Panitan, Capiz sang Agosto 15.
Ini ang ginpahayag ni Renio Beriana, amay sang testigo nga naka-upod sang biktima kag suspek nga nag-inom sang eksklusibo nga mainterview sang Bombo Radyo.
Suno diri, ginsaysay sang iya bata nga nakasaksi sa insidente ang natabo kag suno sa iya bata naglabay lang ang biktima kag gin-akat ini sang iya gumangkon nga mag-inom kaupod ang testigo kag isa pa.
Apang sang mga hubog na ang mga ini, nagpangakat ang gumangkot sang tapungulay sa iya tiyo kag bangud man sa kahulugbon nagpa-oo ini, sang matindog na kuntani ang biktima, hinali ini ginlampusan sang tubo sa ulo rason nga natumba kag ginlapusan sa liwat nga gintunaan man sang iya kamatayon ba-se sa autopsy result.
Gilayon man nga nagdalagan palayo ang duwa bangud sa kahadlok nga sila ang masunod lampusan sang suspek.
Dugang pa ni Beriana nga gintuad sa iya sang himata sang biktima nga posible may kalain sang buot ang suspek sa iya tiyo bangud ginpasibangdan siya sini sadto nga nagkuha sang nadula nga kuwarta.
Madugay na nga kilala ni Beriana ang biktima halin sang soltero tubtob nakapangasawa na ini, gani desido kag ginatuytuyan niya ang iya bata nga magkooperar sa kapulisan.
Panugyan sini sa suspek nga magsungka na kag atubangon ang kasal-anan nga nahimo.
