Naglab-ot na sa P14.4 milyon ang halit sa agrikultura tuga sang padayon nga pag-alburuto sang Mayon Volcano, suno sa Department of Agriculture – Bicol Region (DA-5).
Sa nasambit nga report, ginsiling ni DA-5 spokesperson Lovella Guarin nga 314 ka mga mangunguma kag manugpangisda sa Albay ang naapektuhan matapos matabunan sang ashfall ang 1,466 metric tons sang high-value crops kag fisheries sa kabug-usan nga 116 ektarya sang ulumhan kag palangisdaan. Pila sa mga ini ang yara sa sulod sang anom ka kilometro nga permanent danger zone.
Mahimo nga mag-claim sang insurance ang mga apektado halin sa Philippine Crop Insurance Corporation kag nag-utang sang tubtob P25,000 sa idalom sang Survival and Recovery Assistance Program.
Samtang, nagtan-ay ang DA-Bicol sang masobra P400,000 nga balor sang bulig sa mga livestock owner sa Albay. Isa ka gatos ka sako sang cattle feed ang ginpanagtag sa Albay Breeding Station sa Camalig, kalakip ang nylon ropes, antibiotics kag multivitamins.
Suno sa DA-Bicol, 757 nga mga kasapatan sa 20 pooling sites sa pito ka mga banwa kag syudad sa probinsya ang apektado. Padayon naman ang monitoring kag pagpanagtag sang dugang nga bulig sa mga apektado.
