Nakitaan sang Department of Agriculture (DA) sang mga sinyales sang pagdabong ang sektor sang agrikultura sa Pilipinas apisar pa sa mga serye sang kalamidad, krisis, kag mga outbreak sang sakit sa mga kasapatan.
Suno kay Agriculture Secretary Francisco Tiu Laurel Jr., nagaumpisa na magbunga ang mga intervention kag reporma nga ginahimo sang gobyerno bilang sabat sa epekto sang mga sini nga problema.
Ginasiling niya nga ang sektor sang agrikultura sa pungsod nagapadayon sa husto nga direksyon, kag isa sa mga pamatuod sini amo ang mga record-high nga volume sang mga produkto nga nakuha halin sa nagkalain-lain nga industriya.
Ginpakigbahin sang tiglikom ang mga isyu nga nagapabudlay sa sektor sang agrikultura sa nagligad nga tuig, pareho sang malawig nga pagmala sang duta, asud-asod nga mga super typhoon, volcanic activity, kag ang pagsaka liwat sang kaso sang African swine fever.
Ini nga mga problema, suno sa iya, nag-apekto sa halos tanan nga rehiyon sa Pilipinas kag nagresulta sa pagnubo sang lokal nga suplay sang pagkaon.
Apisar pa man sini, paagi sa mga intervention sang gobyerno, nagapakita na sang paglago ang sektor sang agrikultura, kag subong nga tuig, ginalauman nga maga-ani ang pungsod sang labaw sa 20.46 million metric tons nga palay, nga amo ang pinakamataas nga produksyon sa kasaysayan sang pungsod.
Ginalauman man nga maga-ani ang Pilipinas sang pinakamataas nga sugar output subong nga tuig, samtang sa industriya sang mais, naka-record na sang 2.2 porsyento nga pagdabong.
Kumpiyansa ang agriculture secretary nga kun magpadayon lang ang mga reporma kag intervention nga ginahimo sang karon nga administrasyon, magapadayon ang sektor sang agrikultura sa pagbangon.
