Liwat nga nagpasundayag si Aleia Aielle Aguilar agud makuha ang bulawan nga medalya sa 2024 World Festival Jiu-Jitsu Championship nga ginhiwat sa Mubadala Arena sa Abu Dhabi, United Arab Emirates.
Ginlutos ni Aguilar ang mas dalagkuan kag mabug-at sini nga karibal agud kilalahon nga three-time jiu-jitsu world champion.
Nagpasakop si Aguilar sa 22 kg. division nagikan sa iya nga anay 19 kg nga weight class.
Apang indi ini nangin upang para sa 7-anyos nga anak ni Filipino mixed martial arts founder kag Universal Reality Combat Championship (URCC) president Alvin Aguilar.
Kalakip sa mga ginpakulob ni Aguilar si Sana Alzaabi sang United Arab Emirates sa semifinals kun sa diin nagpagkit ini sang armbar submission sa sulod sang 20 segundos para mag-abante sa girls’ gi kids 2 grey 22 kgs A class final.
Napadayon ni Aguilar ang maayo nga hampang sini sang ginlutos si Sarah Abuhijleh sang United Arab Emirates sa iskor nga 3-0 para makuha ang ladalag-an.
Nagpasalamat man si Alvin sa MVP Sports Foundation kag kay Philippine Olympic Committee (POC) President Abraham “Bambol” Tolentino. Daog sang bulawan nga medalya sanday Marcus Sebastian Dela Cruz (boys gi kids 3 white belt 24 kgs), Ma. Althea Louise Brion (girls gi infant white belt 40 kgs), Yani Alexii Lopez (girls gi junior grey feather 40 kgs) kag Princess Akeisha Reuma (girls gi junior white belt 48 kgs).
