Ginakabig sang Akbayan Youth nga “bare minimum” ang mga programa sang administrasyon ni President Ferdinand Marcos Jr. para sa pungsod partikular sa mga kabataan.
Sa interview sang Bombo Radyo kay Venus Crisostomo, Campaigns Officer sang Akbayan Youth, iya ginpahayag nga kulang pa ang mga tikang sang gobyerno agud masuportahan ang mga nagapadayon nga kinahanglanon sang mga kabataan, ilabi na sa edukasyon, trabaho, mental health kag iban pa nga serbisyo.
Suno kay Crisostomo, nagakinahanglan ang mga kabataan sang mas konkreto kag mas malapad nga mga programa nga indi lamang temporaryo kundi makahatag man sang long term nga kaayuhan sa ila pangabuhi.
Nagapanawagan man ang natungdan sa administrasyon nga pamatian ang mga tingog sang kabataan kag mas palaparon pa ang mga polisa kag programa nga nagahatag sang oportunidad kag proteksyon sa ila.
Matandaan nga sa ikalima nga State of the Nation Address (SONA) ni President Ferdinand Marcos Jr., ginpakigbahin sini ang pila ka mga programa sang gobyerno para sa edukasyon, kabuhi kag empleyo, nga nag-angkon sang nagkalain-lain nga reaksyon gikan sa nagkalain-lain nga sektor, lakip na ang mga youth organizations.
