Akbayan Youth, indi pabor sa pagpalawig sang termino sang Barangay kag Sangguniang Kabataan Officials

Indi pabor ang Akbayan Youth sa hagna nga palawigon ang termino sang Barangay kag Sangguniang Kabataan officials.

Sa interview sang Bombo Radyo kay Nathaniel Arguilles, miyembro sang Akbayan Youth, iya ginpahayag nga indi bastante nga rason ang pagpadayon sang pila ka mga proyekto agud palawigon ang termino sang mga opisyal.

Suno kay Arguilles, makahatag lamang ini sang mas daku nga oportunidad sa mga dinastiya sa pulitika nga magpabilin sa poder.

Ginpanindugan pa sini nga ang nasambit nga proposal daw kaangay nga nagakuha sang kinamatarong sa mga Pilipino nga magpili sang bag-o nga mga lider paagi sa eleksyon.

Bangud sini, nagalaum ang grupo nga ikonsiderar sang maayo sang mga senador ang nasambit nga proposal antes ini himuon nga layi.