Wala sa Pilipinas ang ginapangita sang publiko nga si Ako-Bicol party-list Representative Zaldy Co bangud yara ini subong sa Estados Unidos para sa medical treatment.
Ini ang ginpahayag ni Atty. Princess Abante, Spokesperson sang Kamara, bilang sabat sa mga palamangkutanon angut sa kun diin si Co nga amo ang anay chairman sang Appropriations committee.
Matapos nga napilian liwat sang nagligad nga eleksyon sang Mayo, wala na nakapakita pa sa Kamara si Co halin sang nag-umpisa ang session sang 20th Congress.
Suno kay Atty. Abante, wala pa sang impormasyon sa mga petsa sang travel authority ukon clearance nga ginhatag kay Co.
Matandaan nga nag-resign si Co sa iya posisyon bilang chairman sang appropriations panel sang Enero bangud sa health issues.
Sang damlag lang, gin-alegar ni Navotas Representative Toby Tiangco nga si Co ang nagduso sa paglakip sang binilyon ka pesos nga balor sang mga proyekto sa imprastraktura sa idalum sang P6.3 trillion nga national budget para sa 2026.
Samtang, luyag ipatawag ni Tianco si Co may kaangtanan sa nagapadayon nga imbestigasyon sang Kamara sa ginaalegar maanomaliya nga flood control projects.
Ginpahayag naman ni House Infrastructure Committee lead chairperson kag Bicol Saro party-list Representative Terry Ridon nga imbitaron si Co kun may yara sang verifiable information nga involve ang mamalidha sa mga anomaliya nga proyekto.
Nahibaluan nga si Co ang anay kabahin sang Sunwest Corporation, apang ginaalegar nga nagbiya ini sa kompanya pagkatapos magpadalagan bilang mamalidha sang 2019.
