Ginsiling ni Senate Committee on Women Chairman Senadora Risa Hontiveros nga nagakadapat lamang ang aksyon sang Office of the Solicitor General nga ipakansela ang birth certificate ni suspended Bamban Mayor Alice Guo.
Suno kay Hontiveros, dalayon na nga nakorner si Guo angut sa iya pagpang-abuso sa late registration sang birth certificate gani mas maayo suno diri nga ibulgar na lamang sini ang yara sa likod sang lapnagon nga scam enterprise sa Tarlac.
Ginlaygayan pa sini ang alkalde nga magpaguha na sang pahayag matapos nga magpasaka ang OSG sang petisyon para sa kanselasyon sang iya “certificate of live birth.”
Napamatud-an man suno diri sa imbestigasyon sang Senado nga sumugod pa lang iregular na ang birth certificate sang alkalde.
Matandaan nga ginbalibaran ni Guo sadtong nakaligad nga pagsinapol ang imbitasyon sang Senado bangud sa tuman nga stress kag anxiety nga iya nabatyagan bangud sa mga wala basehan nga alegasyon batuk sa iya.
Kumbinsido naman si Senador Sherwin Gatchalian nga wala gin-atake sang anxiety ang alkalde kundi ginhimo lamang ini nga rason agud indi makatambong sa pagsinapol.
Sa oras nga talikdan ni Guo suno diri ang imbestigasyon sa masunod nga semana, ipa-contempt kag pasakaan na ini sang arrest warrant sang komite.
