Aktibo nga Brgy. Kagawad, nakuhaan sang mga armas-luthang pinaagi sa search warrant

ROXAS CITY – Arestado ang isa ka aktibo nga barangay kagawad sang Brgy. Jaena Sur, Jamindan, Capiz matapos nga nakuhaan sang mga armas-luthang, pinaagi sa gin-implementar nga search warrant sang gintingub nga puwersa sang CIDG-Capiz,  CIDG RSOT 6, Jamindan MPS, Capiz PPO-PIU kag 602^nd COY RMFB 6, alas-7:15 kagab-i, Agosto 30.

Ginkilala ang gin-arestado kay Regio Eleterio Ino, 50-anyos, kag residente sang nasambit nga barangay.

Nakuha sa kontrol kag posesyon ni Ino ang 1 ka unit sang calibre .45 pistol Armscor nga may duha ka magazine kag 16 tanan ka mga bala sang nasambit nga armas-luthang, kag 1 ka unit sang homemade shotgun nga may 2 ka mga bala.

Ginpatigayon ang search warrant sa presensiya ni Punong Barangay Michael L Santiago, nga bunga sang “Oplan Paglalansag Omega” sang mga otoridad.

Ang search warrant ang gin-isyu ni Hon. Judith D Orendain -Tonogbanua, Executive Judge, RTC Branch 20, Mambusao, Capiz napetsahan Agosto 30, 2022.

Sa karon, ang gin-aresto ang yara sa CIDG-Capiz, para sa nagakaigo nga disposisyon.