ROXAS CITY-Patay na sang masapwan ang isa ka mister sa iya puloy-an sa Mejorada Subdivision, Barangay Inzo Arnaldo, Roxas City.
Ginkilala ang biktima kay Gerry Villarosa, tumandok sang Davao Del Norte apang temporaryo nga nagapuyo sa nasambit nga lugar.
Suno kay William, abyan sang nasambit nga biktima nga katapusam nga nakit-an si Villarosa sang Miyerkules nga adlaw.
Ginpahayag sini nga ginkatingala nila nga wala makaguwa kahapon nga adlaw si Villarosa rason nga ginpadulungan nila ini sa iya nga puluy-an apang ginkakibot sini nga patay na ang biktima nga yara na sa advance state of decomposition.
Gidugang pa sini nga wala man sang kaaway sa nasambit nga barangay si Villarosa bangud kilala ini nga mabuot.
Ginapatihan nga posible gin-atake ini sang ginasuprer sini nga balatian ang biktima.
Samtang, padayon pa ang imbestigasyon sang mga kapulisan agud matul-id gid ang gintunaan sang kamatayon ni Villarosa.
Mahibaluan nga nagaisahon nga naga-istar sa iya nga balay si Villarosa bangud ang iya asawa kag mga anak ang yara sa banwa sang Sapian.
Magluwas nga nagabiyahe ini sang tricycle, aktibo man ini nga miyembro sang KABALIKAT CIVICOM.
