Akusasyon nga utok sa pagpatay sa bise alkalde kag bakla ginpanginwala sang anay alkalde sang Tapaz, Capiz

ROXAS CITY – Ginpanginwala sang anay alkalde sa banwa sang Tapaz, Capiz ang mga alegasyon sang anay kabulig nga ini ang utok sa pagpatay sa anay bise alkalde sang Tapaz.
Sa interview sang Bombo Radyo kay anay Tapaz Mayor Romualdo Exmundo Jr., ginpahayag sini nga handa sini nga pamatud-an nga inosente ini sa mga akusasyon ni Leomer Lapidez.
Nagapati si Exmundo Jr., nga kaakig ang ginhalinan sang tanan nga mga kabutigan nga gin-imbento sang anauy kabulig matapos nga ginpasakaan niya ini sang kaso nga qualified theft kag may ginpaguwa na nga warrant of arrest para diri.
Gindepensahan man sang anay alkalde ang kaugalingon batuk sa mga akusasyon nga ini ang bading kag makapila ka beses nga may natabo sa ila Lapidez.
Suno kay Exmundo nga imposible man ini bangud kaupod sini sa pagtulog sa ila hulot ang asawa.
Sa matandaan nga ginluthang-patay si anay Vice Mayor Victor Gardoce samtang nagapadulong sa isa ka okasyon sa isa ka barangay sa nasambit nga banwa.