Nagdesisyon nga indi anay mag-upod sa Alas Pilipinas women’s volleyball team sanday Angel Canino, Shevana Laput kag Amie Provido para sa masunod nga AVC Women’s Cup. Suno sa tatlo ka manugdula sang De La Salle Lady Spikers, kinahanglan anay nila nga hatagan sang tion ang ila lawas nga makapahuway kag maka-recover matapos ang mabudlay kag mabaskog nga kampanya sa UAAP Season 88 kun sa diin nagkampeon ang ila koponan.
Sa isa ka Instagram story, ginpahayag ni Canino nga daku nga dungog para sa iya ang maimbitahan sa national team kag makadula para sa pungsod. Apang suno sa iya, mas importante anay nga mahatagan sang nagakaigo nga pahulay ang ila lawas agud makabalik sila nga mas preparado kag mas mabaskog sa masunod nga mga kompetisyon.
Ginpabalo naman nila ang ila desisyon sa Philippine National Volleyball Federation kag nagpahayag nga padayon ang ila suporta sa Alas Pilipinas samtang naga-compete ini sa AVC Women’s Cup 2026.
Samtang, ginpahayag man nga may iban pa gid nga kilala nga players pareho kanday Jia De Guzman, Bella Belen, Mars Alba, Justine Jazareno, Shaina Nitura kag Alyssa Solomon nga nag-untat man anay sa ila national team duties para sa sini nga torneo. Ang AVC Women’s Cup pagahiwaton sa Candon City halin Hunyo 6 tubtob 1
