ROXAS CITY – Nagapadayon ang imbestigasyon sang fact finding committee sang provincial government kanday Provincial Warden Arjuna Yngcong kag Prison Guard 1 Andreo Llaver sang Capiz Rehabilitation Center (CRC) sa Barangay Lawaan, Roxas City.
Ini ang ginpahayag ni Provincial Administrator Edwin Chinel Monares sang mainterview sang Bombo Radyo.
Suno kay Monares nga ginpakamaayo na lamang nga i-transfer ang duha sa Provincial General Services Office (PGSO) samtang ginapatigayon ang imbestigasyon.
Ini may kaangtanan sa mga anomalya kag indi insakto nga pagdumala sa nasambit nga pasilidad.
Nahibaluan nga nagabaylohanay sang mga akusasyon sanday Yngcong kag Llaver.
Ginpahayag ni Monares nga magluwas sa isyu sa tunga sang mga inmates kag Llaver may yara man sila sang natukiban nga alegasyon batuk kay Yngcong.
Ini may kaangtanan sa pagpanukot ni Yngcong sa mga inmates sa tagsa ka maggamit ukon magtawag sang cellphone sa CRC, pagpanukot sa mga inmates sang inugtughong nga gasolina, indi pagpadala sang mga inmates sa Bilibid Prison sa Muntinlupa City kag paghatag sang special treatment sa mga kilala nga inmates pinaagi sa pagpatinir sa kubol.
Magluwas diri, narekober sa mga inmates ang napulo ka mga unit sang cellphones nga ginagamit sa sulod sang amo nga pasilidad.
Gani, nagdesisyon ang gobyerno probinsyal nga paga-imbestigahan ang nasambit nga mga alegasyon batuk sa provincial warden.
Subongman ang alegasyon sang mga inmates batuk kay Llaver.
Matandaan nga nagpatigayon sang noise barrage ang mga inmates bangud luyag nila pahalinon si Llaver bangud sa ginaalegar pagpangdiskarte naman sini sa ila mga misis.
