Ginpanginwala ni Manila 3rd District Representatives Joel Chua nga ginpasako sang Kamara de Representantes ang impeachment process kay Vice President Sara Duterte.
Isa si Cong. Chua sa 11 kongresista nga nagserbe sa prosecution panel sang Kamara para sa impeachment ni VP Sara.
Sa isa ka pulong balitaan, ginpahayag sang mamalidha nga isa man nga abogado nga constitutional ukon nakasaad sa layi ang mga aksiyon nga ginhimo sang Mababang Kapulungan sang Kongreso.
Ginalauman na man suno diri ang nasambit nga mga pasibangud sang Partido Demokratiko Pilipino Lakas ng Bayan (PDP-Laban).
Nauna na nga nagpahayag ang Partido nga ginapamunuan sang amay ni VP Sara nga si anay Presidente Rodrigo Duterte sa isa ka statement sang sobra nga pagkamalaot kag pagkondenar sa pinadali kag paimbabaw nga impeachment nga maathag nga pagpakita sang mahigko nga pamulitika sa pungsod.
Sang mapamangkot naman ang mamalidha nga may kaangtanan sa pang-apat nagikan sa 7 artikulo sang impeachment batuk kay VP Sara nga may kaangtanan sa ginapahayag nga indi mapaathag nga paghabok sang iya manggad kag kapaslawan nga i-disclose ang iya Statement of Assets, Liabilities, and Net Worth (SALN).
Dugang pa ni Chua nga ini ang base sa ginbuyagyag ni anay Sen. Sonny Trillanes sang pagdinig sa House Quad Committee sang Nobiyembre sang nakaligad nga tuig kun sa diin nakabaton suno si anay Presidente Rodrigo Duterte kag iya pamilya sang P2.4 billion nga deposito sa bangko.
Ginpamangkot man ang mamalidha kun nagpatigayon sang kaugalingon nga kumpirmasyon ang House sa alegasyon ni Trillanes, ginpaathag ni Atty. Chua nga kinahanglan pa nila nga usisaon sang maayo ang mga materyales ukon dokumento bangud bag-o pa lang nga ginhatag ang paga-rebyuhon ang tanan nga ebidensiya sang madamo ka beses.
Apang dugang pa ni Chua nga may mabug-at nga ebidensiya sa una nga 3 artikulo pa lamang sang impeachment kalakip na ang ginapahayag conspiracy sa pag-assasinate kay PBBM, First Lady Liza Marcos kag House Speaker Martin Romualdez kun patyon si VP Sara, malversation sang confidential funds kag bribery kag corruption sang DepEd sa idalom sang pagdumala nya sini sadto.
Samtang, sa kampo naman ni VP Sara, nauna na ini nga nanindugan nga indi sini magabiya sa tunga sang palaabuton nga impeachment trial sa iya sa Senado.
