Ginpanginwala sang mga kapulisan ang alegasyon nga may nagluntad nga robbery incident sang damlag lang sa Sitio Kapul-an, Barangay Agdahon, Cuartero, Capiz.
Sa interview sang Bombo Radyo kay PCPT Alladen Talaban, hepe sang Cuartero MPS, ginpahayag sini nga sandig sa ginhiwat nila nga matul-id nga imbestigasyon sa ginluntaran sang ginapahayag nagluntad nga robbery incident sa lugar nga ginsaysay sang biktima, wala sang kamatuoran.
Dugang pa sini sang nagpadulong kag nagpatigayon sila sang matul-id nga imbestigasyon, wala nagasanto ang mga detaye nga ginsaysay sa ila sang mga namensyunar nga indibidwal sang amo nga negosyante kun sa diin ginpahayag sini nga nakasugata sini sang nagluntad ang amo nga insidente kag base man sa panaysayon sang mga ini, wala man sila sang nadiparahan nga suspected individuals nga nakasugata sa amo nga tion.
Dugang pa nga sang ginatawagan na ang amo nga biktima sang mga kapulisan para sa dugang updates kag follow up investigations, wala na ini naga-kooperar sa ila.
Matandaan nga ginkilala ang biktima kay alyas “Raian”, 42-anyos kag residente sang Barangay Carataya sa amu nga banwa.
Sandig sa panaysayon sini, nakasuksok ang driver sang itom nga bonnet, jacket, shorts kag pula nga helmet samtang ang backrider naman sini ang nakasuksok naman sang itom nga jacket, shorts kag puti nga helmet.
Dugang pa sini, nataban sang mga suspek ang kapin P54,000.00 nga balor sang kwarta kag madasig nga nagpalagyo sakay ang Bajaj nga motorsiklo.
Apang, pananglitan nga mapamatud-an sang mga kapulisan nga nagabinutig si Raian, suno kay Talaban, posible ini nga mapasakaan sang nagakaigo nga kaso.
