ROXAS CITY – Nagdepensa ang punong barangay sang Barangay Cabugao, Panitan, Capiz natuhoy sa ginahaboy nga alegasyon batuk sa iya nga nagapangayo ini sang P1, 000 sa P6, 000 nga ayuda sa baylo nga ilakip sa listahan sang Social Amelioration Program (SAP) sang Department of Social Welfare and Development (DSWD) bisan indi kwalipikado.
Suno kay Punong Barangay Leonel Delay, lunsay wala ini sang kamatuoran bangud gintinguhaan gid sini nga matapod ang halos tanan nga residente para makabaton sang amo nga ayuda.
Suno diri nga una nga natigayon nga mahatagan sang ayuda ang 198 ka mga SAP beneficiaries kag may 26 ka mga ginpangkakas sa listahan sandig sa pag-validate sang DSWD.
Ginpahayag sini nga may isa ka tawo nga nagtipon sa 26 ka mga wala ma-qualify para magreklamo batuk sa iya.
Bangud diri, gin-atubang ini sang kapitan kaupod ang alkalde mismo sang banwa kag diri ginduso niya gid nga sila ang mahatagan man sang ayuda para wala na sang gamo.
Suno diri nga natigayon naman sila nga mahatagan sang amo nga ayuda gani natingala siya kun ngaman may nagpatu-pato naman sang istorya batuk sa iya.
Nagapati ini nga may naga-asot lamang kag nagapakalain sa iya bilang amay sang ila nga barangay.
