PILAR, CAPIZ – Gin-athag ni Pilar PNP Chief PMAJ Rachele D. Garnica nga wala sang kamatuoran ang alegasyon nga pagpang-harass sang mga police sa mga mangunguma sa Brgy. Cayus, Pilar, Capiz.
Sa interview sang Bombo Radyo kay PMAJ Garnica nga nag-responde lamang sila sa nasambit nga lugar bangud sa report nga ila nabaton nga may nagluntad nga komosyon nga inagaway sang duta sa magtimbang nga grupo sang mga mangunguma kag sa ginaalegar nga pagpangtapas sang tubo sa indi ila nga duta.
Suno diri nga ang tinutuyo lamang sang ila tropa sa pagpadulong sa lugar amu ang mamintinar ang kalinong kag magpatunga sa posibilidad nga kinagamo sa magtimbang nga grupo sang mga mangunguma.
Pahayag pa ni Garnica nga wala man sang may natabo nga pagpangtabog ukon pagpauntat sa ginahimo sang mga mangunguma bangud sa pagkamatuod suno diri pag-abot nila sa lugar wala na sang tawo.
Dugang pa sini nga may nagguwa lamang nga grupo sang mga mangunguma sang naghana na ang mga ini nga maglakat kag magpadulong sa Barangay Hall agud kun tani mag-report.
Diri kag nakahinala pa sini ang mga mangunguma kag ginpanugyanan nga kun may may ara gidman nga naagrabyado sa ila mag-report lang sa police ukon sa korte.
Kabaliskaran naman ini sa ginpalab-ot nga reklamo sa Bombo Radyo ni Mr. Orinse nga isa sa mga mangunguma kun sa diin ginpahayag sini nga gin-harass sila sang mga kapulisan.
Suno pa kay Garnica nga maayo ang pag-istoryahanay sini sa mga farmers kag nagpasalig pa ang mga mangunguma nga indi magtuga sang gamo.
Sa bahin suno diri sang kapulisan wala sila sang kinamatarong nga magpanghilabot sa civil case ukon away sa duta kundi nagpadulong lamang ang mga ini agud mag-pacify sa posible nga magluntad nga komosyon.
Sa karon plano sang Pilar PNP nga ipatawag ang both parties kag istoryahon ang Punong Barangay kag mahimo sila nga makapatunga agud indi magluntad ang kinagamo kag eksplikar ang desisyon sang korte.
