ROXAS CITY – Gintawag nga malisyoso ni Capiz 1st district Board Member Jonathan Sonny Besa ang alegasyon ni Presidente Rodrigo Duterte kay anay Liberal Party presidential candidate Mar Roxas nga yara sa likod sang ginapahayag duha ka beses nga pagpang-ambush sa iya anay police aide kag karon si Daanbantayan, Cebu Mayor Vicente Loot.
Ginpahayag ni Besa, nga madugay na nga kaalyado ni Roxas sa Partido Liberal, nga lunsay kabutigan lamang ang alegasyon sang Presidente bangud suno sa iya, wala sang kapasidad si Roxas nga magmandu agud ipapatay ang isa ka indibidwal.
Nagapati man si Besa nga may lamud-pamulitika ang nangin pahayag sang Presidente bangud suno sa iya, mabaskog ang tiyansa ni Roxas nga magdaog bilang senador para sa 2019 midterm elections.
Mahibaluan nga sa pamulong-pulong sang Presidente sa Davao City, ginpahayag sini nga indi siya ang nagmandu ni ipapatay si Loot kundi si Roxas.
Naakig suno kay Duterte si Roxas sang mahibaluan nga may kahilabtanan sa ilegal nga droga ang anay police general rason nga ginmandu sini nga patyon na lamang agud indi na siya mahuy-an.
