Sa pagdinig sang Senado may kaangtanan sa ginaiyahan nga anomalya sa mga flood control projects, nagbuyagyag ang 18 ka nagapakilala nga anay mga Marine nga sila kuno ang nagadala sang mga maleta nga puno sang kuwarta para sa pila ka kilala nga opisyal sang gobyerno kag mga personalidad sa politika.
Base sa ila ginpirmahan nga joint affidavit, naga-angkon sila nga nangin mga “bagman” sang anay Ako Bicol Party-list Representative nga si Zaldy Co kag naghatod sang ginapatihan nga kickback halin sa mga proyekto sang flood control. Suno sa ila, ang kada isa ka daku nga maleta kuno nagalakip sang mga P48 milyon nga kuwarta.
Sa testimonya sang isa ka testigo nga si Johnny Buduan, nag-angkon ini nga sang tuig 2022 may lima ka maleta nga gindala sa Ilocos Norte nga kuno ginlalaan para kay Presidente Ferdinand Marcos Jr. Ginpahayag man nga may mga maleta nga gindeliber sa tion sang kampanya kag kuno ginbaton ni Sandro Marcos.
Ginsugid man sang mga testigo nga may mga maleta sang kuwarta nga kuno gindeliber kay anay Senate President Vicente Sotto III sa Parañaque kag kay Senador Erwin Tulfo sa iya puluy-an sa duha ka magkalain nga okasyon.
Lakip man sa mga ngalan nga ginbanggit sang mga testigo nga kuno nakaangot sa mga pagtililipon ukon pagdawat sang mga maleta amo sanday Leila de Lima, France Castro, Antonio Trillanes IV kag iban pa nga mga mambabatas kag personalidad.
Tubtob subong, alegasyon pa lamang ini nga ginlatag sang mga nagtestigo sa Senado kag wala pa sang pinal nga desisyon ukon hukom nga nagapamatuod sa mga sini nga pag-angkon.
