NEW YORK — Isa naman ka mabug-at nga hangkat ang atubangon sang Filipina tennis ace nga si Alex Eala matapos siya makasulod sa third round sang US Open.
Ginlampuwasan ni Eala ang Ukrainian nga si Oleksandra Oliynykova sa iskor nga 6-1, 6-4 agud makasulod sa sunod nga round, samtang ginpierdihan naman ni world No. 14 kag American tennis player Iva Jovic ang Briton nga si Francesca Jones, 6-4, 6-4.
Ini na ang ikatatlo nga pag-atubang sang duha ka tennis players. Sa ila duha ka una nga engkwentro, si Jovic ang nagdaog. Una niya ginpierdihan si Eala sa French Open sang Mayo, 6-4, 6-2, antes liwat nga magdaog sa Queen’s Club sang Hunyo, 6-2, 6-2.
Apang bisan pa may bentaha si Jovic sa ila head-to-head record, positibo ini sa liwat nila nga pagkita, ilabi na nga sa hard court na sila magahampang.
Gintawag ni Jovic si Eala nga isa ka manugtennis nga nagapakita sang maayo nga performance, samtang ginlaragway naman ni Eala si Jovic bilang isa ka “amazing player” nga mataas ang abilidad kag maayo magdesisyon sa court.
Para kay Eala, isa ini ka daku nga oportunidad nga makabawi sa iya duha ka kapierde batok kay Jovic kag makapadayon sa mas mataas nga round sang torneo.
Kun madaug ni Eala ang ila third-round clash, matupungan sini ang iya pinakamaayo nga performance sa Grand Slam tournament, matapos nga nakaabot siya sa fourth round sang Wimbledon mas temprano sini nga tuig.
Suno kay Eala, daku na nga achievement para sa iya ang pagkasulod sa third round sang US Open, kag mas nagahatag ini sa iya sang kumpiyansa samtang nagapadayon ang iya kampanya sa prestihiyoso nga Grand Slam event.
