Nangin madinalag-on ang General Membership Assembly 2026 sang Liga ng mga Barangay sa Roxas City nga ginpatigayon sa isla sang Boracay.
Sa interview sang Bombo Radyo kay Punong Barangay Roberto Ross Roldan, President sang Liga ng mga Barangay sa Roxas City, iya ginpahayag nga madamo sang bag-o nga ihibalo ang ila natun-an sa sulod sang tatlo ka adlaw nga assembly.
Suno kay Roldan, isa sa mga ginhatagan sang pagtamod amo ang “Alisto si Kap Program,” nga nagatudlo sang nagakaigo nga pagdumala sa barangay, lakip na ang husto nga pag-segregate sang basura kag iban pa nga mga inisyatibo para sa kaayuhan sang komunidad.
Ginalauman man sini nga ila magamit ang mga leksyon nga ila natun-an agud mapauswag pa ang serbisyo nga ginhatag sa tagsa ka barangay sa Roxas City.
