ROXAS CITY – Hugot ang pagpamatuk sang bise alkalde sang banwa sang Sigma sa plano nga pagpatindog sang Sanitary Landfill kag Ecological Solid Waste Management sa Barangay Acbo sang amo nga banwa.
Ini ang ginpahayag ni Vice Mayor Stephen Alayon sang mainterview sang Bombo Radyo.
Suno kay Alayon nga indi sini luyag nga baklon sang provincial government ang duta bangud ginapanumdom sini ang ikaayong lawas sang mga residente.
Ginpahayag sini nga madamo sang mga residente ang maapektuhan bangud sa mga ginatambak nga mga basura nagikan pa sa iban nga mga kabanwahanan.
Ginkompirmar man sini nga may pila ka mga Sangguniang Bayan Members ang nagapamatuk man sa amo nga plano rason nga wala ini maaprubahan gilayon sa ila ginpatigayon nga session sang Lunes nga adlaw.
Dugang pa sini nga kinahanglan anay nga mabatian sang probinsya ang sentimyento sang mga residente antes dayunon ang nasambit nga plano.
Sa pihak nga bahin, aminado naman si Mayor Christopher Andaya nga daku ang mabulig sang Ecological Solid Waste Management sa mga pumuluyo sa lugar kun sa diin makatuga pa ini sang madamo nga trabaho sa mga pumuluyo kag tourist attraction.
Nagpanindugan man ini nga indi niya luyag nga patindugan sang Sanitary Landfill ukon himuon nga dumpsite ang ila nga banwa bangud napanumdom niya man ang ikaayong lawas sang mga residente.
Apang, kinahanglan lamang nga ma-eksplikar sang maayo sa mga pumuluyo ang importansya sang Ecological Solid Waste Management agud maintiendihan man nila ang tinutuyo sini.
Samtang, gin-athag naman ni Andaya nga wala ini nagpasugot bangud ang ginarequest lamang sini nga ipapasar ang resolution sa Sangguniang Bayan amo ang baklon lamang sang provincial government ang duta sa lugar nga ginapanag-iyahan sang Pamilya Ponsalan.
Matandaan nga hugot gid nga nagapamatuk ang mga residente sang Sigma sa plano nga pagpatindog sang Sanitary Landfill sang gobyerno probinsyal partikular na ang Barangay Acbo sa amo nga banwa kun sa diin nagpatigayon pa sila sang hublag protesta.
