Nagpaguha na sang public apology ang isa ka alkalde nagikan sa Visayas matapos nga nag-share sang sala nga impormasyon may kaangtanan sa ginapahayag pagtaliwan ni Pope Francis.
Sa mensahe nga ginpaguha ni Lapu-Lapu City Mayor Junard Chan pinaagi sa iya facebook page, nagapangayo siya sang pasaylo bangud sa pagkapost sa sala nga impormasyon nga may petsa Pebrero 23, 2024 kung sa diin nakabutang nga nagtaliwan na ang Santo Papa apisar nga padayon pa ini nga nagapakigbato sa iya sakit.
Suno sa alkalde, naintindihan nila nga pagkabalaka kag pagtalang ang posible nga resulta sang nasambit nga post, kalakip na ang posible nga kaakig nga mabatyagan sang Roman Catholic community.
Nagpangayo man ini sang pasaylo sa mga posible nga nagapati sa sala nga impormasyon.
Kadungan sini, ginsiguro sang kampo sang alkalde nga hugot pa nila nga siguraduhon ang mga impormasyon nga igapaguha sa social media page nga beripikado, intsakto kag matuod.
Ginsiguro man sini nga kalakip sila sa mga nagapangamuyo para sa dalayon nga pag-ayo sang Santo Papa kag mapadayon sini ang iya misyon bilang Vicar of Christ sa kalibutan.
