ROXAS CITY-Gin-athag sang alkalde sang banwa sang Maayon nga may yara sang koordinasyon kag wala ginpabay-an ang ginlubong nga covid-19 positive sa Maayon Public Cemetery.
Sa interview sang Bombo Radyo sa kay Maayon Mayor Raymond Malapajo ginpahayag sini nga wala sang kamatuoran nga wala sang koordinasyon sa LGU ang paglubong sa nasambit nga covid positive bangud sa ospital pa lang padayon na ang koordinasyon sini sa Rural Health Unit sang nasambit nga banwa.
Suno sa kay Malapajo nga preparado na ang buho nga butangan sang nasambit nga bangkay apang namalibad ang caretaker sang patyo nga magtambak sa nasambit nga buho.
Aminado si Malapajo nga nakahibalo ini nga trabaho sang mga katapo sang Maayon Emergency Response Team (MERT) ang pagtambak sa nasambit nga buho apang suno sa kay Malajapao nga natam-an nga may yara sang ginrespondihan ang MERT rason nga wala gilayon matambakan ang nasambit nga buho.
Samtang nagasakit naman buot sang alkalde sa mga alegasyon sang tagareklamo nga lunsay wala sang kamatuoran.//
Pa-athag ni Malapajo nga wala sini ginapabay-an ang mga ginalubong nga mga covid positive bangud siya man sa guihapon ang basulon sang mga residente sa tion nga maglapta ang virus
Matandaan nga nagpalab-ot sang reklamo ang pila ka mga pumuluyo malapit sa Maayon Public Cemetery matapos nga ginapahayag kapin duha ka oras nga wala nalubong ang napatay nga covid positive sa nasambit nga patyo.
