ROXAS CITY – Ginpasalig sang alkalde sa banwa sang Pilar nga imbestigaran kun may yara sang anomalya nga nagakahinabo sa pabahay sang National Housing Authority (NHA) sa Barangay Santa Fe, Pilar, Capiz.
Sa interview sang Bombo Radyo kay Mayor Arnold Perez ginpahayag sini nga wala pa mabaton sang lokal nga gobyerno sang Pilar ang nasambit nga pabahay apang ginpasalig sini nga usisaon kun may yara sang anomalya nga nagakahinabo.
Suno kay Perez nga may mga nagpalab-ut sa iya sang impormasyon natuhoy sa baligyaanay sang mga housing units apang indi pa sini mahatagan sang aksyon ang amo nga reklamo bangud wala pa ini na tugyan sang NHA sa ila.
Samtang, ginpahayag man ni Perez nga wala pa ini sang ideya kun may yara sang mga indi kwalipikado nga mga benepisyaryo nga ginlakip sa listahan sang nasambit nga pabahay.
Suno sa opisyal nga wala pa sini nakita ang listahan sang mga benepisyaryo agud makita kun may yara sang mga indi kwalipikado nga nalakip bilang benepisyaryo.
Ginalauman naman nga sa Disyembre subong nga tuig iga-turn over sang NHA sa LGU ang nasambit nga pabahay.
