ROXAS CITY -Ginkumpirma sa Bombo Radyo ni Mayor Receliste ‘’Tanoy’’ Escolin ang plano nga pagpadalagan bilang president sang League of Municipalities of the Philippines –Capiz chapter.
Suno kay Escolin natigayon na sini nga makunsulta ang iya plano kay Governor elect Esteban Nonoy Contreras kag Capiz 1st District Congressman elect Emmanuel Billones Sr., nga nagpahayag sang suporta sa iya.
Amat amat na nga nakapakig-angut si Escolin sa mga alkalde sa premier kag segundo distrito sang probinsiya para personal nga hinyuon ang ila nga suporta sa iya plano nga pagpadalagan sa LMP-Capiz chapter.
Wala man ini sang nakita nga malain kun mangin kasumpong sini si Mambusao Mayor Leodegario ‘’Jun’’ Labao sa amo nga posisyon, bangud mas maayo ini agud makapili sang maayo ang mga alkalde kun sin-o ang ila luyag nga mangin president sang LMP sa probinsiya.
Ginpanindugan sini nga ang tuyo sang iya nga pagpadalagan amo nga makabulig sa mga kaupdanan nga alkalde.
Ginpahayag pa ni Escolin nga wala man ini nagpromesa sang palapaw, apang ginpasalig nga buligan ang mga LGUs nga mangin masadya ang event nga patigayunon sa ila kapistahan.
Ginpasiguro man sang alkalde nga indi siya magkuha sang pondo sang banwa nga gamiton sa amo nga event, bangud personal sini nga kuwarta ang iya gamiton.
