ROXAS CITY -Naghatag sang reaksyon ang alkalde sang banwa sang Dumalag natuhoy sa nangin iregularidad sa distribusyon sang Social Amelioration Program ukon SAP sa Barangay Duran kag Santa Carmen sang nasambit nga banwa.
Suno sa pahayag ni Mayor Amado Eriberto Castro Jr., nga wala ini nagkulang sa pagpahanumdum sa mga barangay officiasl sang nasambit nga banwa nga sundon ang ginapatuman nga pagsulundan sa pagpanagtag sang nasambit nga ayuda.
Wala naman sang mahimo pa ang alkalde sa mga barangay officials nga ginpasakaan sang panumbungon.
Samtang ginkakibot naman ni Castro nga ginpapanaugan ini sang “show cause order” sang DILG natuhoy sa atrasado nga distribusyon sang nasambit nga ayuda.
Ginpahayag ni Castro nga nakatigayon nga matapos sang banwa sang Dumalag ang distribusyon sang SAP isa ka adlaw antes ang gintalana nga plaso.
Dugang pa sini nga may yara sang record sa munisipiyo nga nagapamatuod nga wala sila na atrasar sa releasing.
Ginpabugal man ni Castro nga may yara sang kapin P8 milyones nga nabilin nga pondo nga wala naubos sa distribusyon sang nasambit nga ayuda.
Ini bangud sa ila tama nga pagpatuman sang pagsulundan natuhoy sa distribusyon sang SAP.
