ROXAS CITY – Gin-athag sang alkalde sang banwa sang Ivisan, Capiz nga indi resibo sang isa ka money remittance center ang ginputos sa shabu nga nakita kag ginsurrender sang isa ka pedicab driver sa nasambit nga banwa.
Sa interview sang Bombo Radyo kay Mayor Felipe Neri Yap gin-athag sini nga nakaputos sa diyaryo ang shabu nga ginturn-over sa iya sang pedicab driver.
Ginpahayag ni Yap nga ginkakibot sini nga ginturn over sa iya ang shabu nga ginapatihan nawigit sang wala matumod nga persona.
Gilayon man sini ginsilyo ang nasambit nga shabu kag ginturn-over sa Ivisan Municipal Police Station agud ipaidalum sa chemical analysis.
Indi pa mapat-ud ni Yap kun residente sang nasambit nga banwa ang tag-iya sang shabu bangud alagyan kag madamo sang nagaagi sa nasambit nga banwa.
Apang ginpasalig sini nga nagapatigayon na sang imbestigasyon ang mga kapulisan agud matumod ang tag-iya sang nasambit nga iligal nga droga.
Samtang ginahulat na lamang sang alkalde ang resulta sang chemical analyst agud matumod kun shabu ang ginturn-over sa iya.
Matandaan nga kapin sa 5 gramos ang kabug-aton sang nasambit nga shabu kag ginabulubanta nga P25,000 ang market value sini.
