ROXAS CITY – Ginapanindugan sang alkalde sang banwa sang Mambusao nga wala ini sang iban nga pagakilalahon nga gobernador sang probinsiya sang Capiz tobtob sa pagtakup sang iya termino kundi si out going governor Antonio del Rosario.
Ginhimo ni Mayor Leodegario ‘’Jun’’ Labao Jr., ang pahayag bangud nagapati ini nga indi niya kinahanglan ang suporta ukon proyekto gikan sa gobyerno probinsiyal agud makahatag sang maayo nga serbisyo sa mga pumuluyo sang iya banwa.
Ginpahayag pa ni Labao nga wala ini nagakinahanglan sang bulig ni Governor elect Esteban Nonoy Contreras, gani nungka nga magpadulong ini sa kapitolyo probinsiyal.
Apang kun si Contreras mismo ang magpalapit sa iya kag hatagan sang proyekto, pasalamatan niya ini.
Ginpabugal man sang opisyal ang nangin improvement sang Mambusao sa iya kaugalingon nga kapasidad kag pagtingwa nga wala sang nabaton nga bulig sadto kay outgoing governor Antonio del Rosario.
