ROXAS CITY-Aminado si President Roxas Mayor Receliste Tanoy Escolin nga halos makalbo na ang pila ka mga porsyon sang bukid sa Barangay Badiangon, President Roxas Capiz.
Ini ang pahayag sang alkalde matapos nga ginabasol sang pila ka mga residente ang halos makalbo na nga mga kabukiran nga amo ang gintunaan sang pagbaha nga ginkamatay sang isa ka mister sa nasambit nga barangay.
Sa interview sang Bombo Radyo Roxas kay Escolin, Aminado ini nga halos makalbo na ang mga kabukiran sa amo nga barangay bangud ginahimo ini nga talamnan sang mais.
Suno sa alkalde nga ginpangpukan sang mga tag-iya sang duta ang mga punong kahoy kag ginhimo nga talamnan sang mais.//
Apang pa-athag ni Escolin nga wala man naubos ang mga kahoy sa bilog nga kabukiran sang Badiangon kag may yara gid lamang porsyon sang bukid nga talamnan sang mais nga madugay na nga ginahimo sang mga mangunguma.
Dugang pa ni Escolin nga wala man nagkulang ang lokal nga gobyerno sa paghatag sang panugyan sa mga mangunguma nga likawan ang pagpukan sang mga puno sang kahoy.
Samtang liwat nga nagpanawagan ang alkalde sa mga mangunguma nga likawan ang pagpamukan sang punong kahoy sa amo nga bukid.
