ROXAS CITY – Nagtambong sa ginpatawag nga sinapol ni President Rodrigo Roa Duterte ang alkalde sang banwa sang President Roxas sa Metro Manila kagab-i.
Gintalakay sang presidente ang pila ka mga isyu kaupod ang mga alkalde kag gobernador sa bug-os nga Pilipinas.
Ginpahayag ni Mayor Receliste ‘’Tanoy’’ Escolin nga ginpahanumdum sila sang presidente nga mangin handa kag preparahan ang kalamidad kasubong na lamang sang Novel Coronavirus (nCoV) nga naglab-ot na sa isa ka libo ang napatay sa mga pungsod nga naapektuhan sang amo nga balatian.
Gin-estoryahan man sa sinapol ang malapnagon nga African Swine Fever (ASF) kag mga ninja cops ukon police scalawags.
Apang talalupangdon suno kay Escolin ang cool nga presidente Duterte nga nag-atubang sa ila kagab-I, kabaliktaran sang nagliligad nga mga tinuig nga tuman ka agresibo kun magbuhi sang mga tinaga.
Samtang suno kay Escolin nga ginklaro naman ni DOH Secretary Francisco Duque III nga indi kinahanglan nga magsuksok sang face mask kun wala man lamang sang sakit kasubong sang ubo ukon respiratory illness, bangud indi makuha sa hangin ang nCoV.
