ROXAS CITY – Ginmandu sang alkalde sang siyudad sang Roxas ang pagtukod sang Dengue Crisis Committee agud masolusyunan ang padayon nga pagsaka sang kaso sang dengue.
Ini ang nangin direktiba ni Mayor Ronnie Dadivas kadungan sang opisyal sini nga pagpungko bilang local chief executive.
Mahibaluan nga una na nga ginpahayag sang Provincial Health Office (PHO) ang posibilidad nga pagdeklarar sang dengue outbreak sa probinsiya sang Capiz bangud sa padayon nga pagsaka sang numero sang nasambit nga balatian.
Mahibaluan nga base sa pinakaulihi nga monitoring sang ahensiya, nakarekord na sang 1, 856 nga kaso sang dengue sa probinsiya sini nga tuig kun sa diin may pinakamadamo amo ang sa siyudad sang Roxas nga may 353 cases.
Magluwas diri ginkompirma man sang Philippine Red Cross – Capiz Chapter nga nagakahubsan na sang platelet concentrate blood ang ila nga talatapan nga ginagamit para sa dengue patients.
