ROXAS CITY – Ginaduso ni Tapaz Mayor Roberto Nonong Palomar ang pagbiya sa puwesto ni OIC-Dra. Leah Del Rosario bilang Provincial Health Officer sang Capiz Provincial Health Office ukon Capiz-PHO.
Sa interview sang Bombo Radyo ginakwestion sini ang plano sang Provincial Health Office batuk sa Coronavirus Disease ukon COVID-19 nga nagaapekto na karon sa probinsya.
Suno kay Palomar nga wala sang direksyon ang pagpakigbato sang probinsiya sa nasambit nga balatian.
Ginabasol pa sang alkalde si Del Rosario sa wala paghimo sang mga tikang ukon pamaagi angut sa ginahinyo sang anay sang pila ka mga alkalde nga magpahamtang sang kaugalingon nga RT-PCR testing laboratory.
Wala man malikawan ni Palomar nga magpaguwa sang kalain sang buot natuhoy sa wala pag-aprubar sang PHO sa ginahinyo sini nga dugang nga med-tech sa banwa sang Tapaz.
Bangud diri, nagpanawagan si Palomar nga magbiya na lamang sa puwesto si Del Rosario kag tal-usan sang indibidwal nga nakahibalo sa paghitsu sang nasambit nga problema.
Magluwas pa diri, dugang pa sang alkalde nga napaslawan man ang probinsya nga preparahan ang hinali nga pagsaka sang nasambit nga balatian.
Samtang ginpabutyag naman ni Palomar ang kakulangan sang koordinasyon sang natungdan nga talatapan sa mga Local Government Units ukon LGU’s sa mga nagpalauli nga LSI’s kag mga OFW repatriates sa probinsya.
