Nakita sang Alliance of Concerned Teachers (ACT) Philippines ang katuyuan sang defense camp ni Vice President Sara Duterte nga gub-on ang kredibilidad sang una nga testigo nga ginpresentar sang prosekusyon may kaangtanan sa una nga artikulo sang Articles of Impeachment.
Sa interview sang Bombo Radyo kay Carl Marc Ramota, Vice Chairperson sang ACT Philippines, iya ginpahayag nga isa ka normal nga estratehiya sa depensa sa isa ka impeachment trial ang pagkwestyon sa kredibilidad, kwalipikasyon, kag pagkamasaligan sang isa ka witness agud mapaluya ang kabug-aton sang iya testimonya.
Suno kay Ramota, apisar ila ginlauman ang ini nga lihok sang depensa, importante para sa impeachment court nga magpabilin nga nakatutok sa mga ebidensya nga ginpresentar sang magtimbang nga bahin kag indi lamang sa mga taktika nga tuyo nga paluyahon ang mga testigo.
Ini kasunod sang pagpangusisa sang depensa kay John Mark Calilung, senior agent sang National Bureau of Investigation (NBI), nga amo ang una nga testigo sang rosecution.
Sa cross-examination, ginkwestyon sang depensa ang iya kwalipikasyon, eksperyensya, kag papel sa pagrepaso sang video sang press conference ni Bise Presidente Sara Duterte sang Nobyembre 2024, nga kabahin sang ebidensya nga ginpresentar sa una nga artikulo sang impeachment may kaangtanan sa alegasyon sang grave threats.
Dugang pa sang natungdan, importante nga ang desisyon sang impeachment court ang mangin patas, independent, kag base lamang sa ebidensya agud mapabilin ang pagsalig sang publiko sa proseso kag manabat ang sin-o man nga opisyal sang gobyerno kon mapamatud-an nga responsable.
