Ginkadismaya sang Alliance of Concerned Teachers nga wala sang ginpain nga pondo para sa recruitment sang bag-o nga public school teachers para sa school year 2027.
Sa interview sang Bombo Radyo kay Nebuchadnezar Catiempo Aller, Vice President sang alliance of Concerned Teachers Region 6 Union-Capiz Division, iya ginpahayag nga mabudlay mapataas ang kalidad sang edukasyon kun kulang ang mga manunudlo.
Suno kay Aller, overworked na ang madamo nga teachers bangud sa kadamuon sang ila ginahandle nga mga estudyante.
Ginpahayag man sini nga isa sa mga pagpanghangkat nga ila ginapangatubang amo ang kakulangan sang mga classrooms bangud yara sa masobra sa 50 ka estudyante ang sa isa ka classroom, imbes nga 30 tubtob 35 lamang.
Nagalaom naman ang natungdan nga mahatagan sang naigo nga pondo ang sektor sang edukasyon agud madugangan ang mga manunudlo kag mga classrooms sa pungsod.
