Ginkondena sang Alliance of Concerned Teachers ang asud-asud nga mga insidente sang school violence sa mga eskwelahan, partikular na ang mga insidente nga may kaangtanan sa mga menor de edad kag paggamit sang armas luthang.
Sa interview sang Bombo Radyo kay Ruby Bernardo, national chairperson sang Alliance of Concerned Teachers, iya ginpahayag nga makaalarma ang padayon nga pagluntad sang mga insidente sang violence sa sulod kag sa palibot sang mga eskwelahan bangud yara sa peligro ang seguridad sang mga estudyante kag manunudlo.
Suno kay Bernardo, mas makahalanusbo bangud may mga menor de edad nga involved sa pila ka mga insidente kag nakagamit pa sang armas, gani dapat hibaluon kun paano nila nakuha ang amo nga mga armas.
Ginpanindugan sini nga dapat manabat ang mga indibidwal nga nagpabaya kaupod ang panawagan nga pabaskugon ang mga tikang agud masiguro ang kaluwasan sa mga eskwelahan.
Dugang pa sang natungdan, ang kasubong nga mga insidente indi dapat makabig nga isolated cases lang kag kinahanglan nga atubangon ang ugat sang kalakasan sa eskwelahan agud nga maproteksyunan ang mga estudyante, manunudlo kag iban pa nga mga school personnel.
